| ဧပြီလ ၁၅ ရက် သင်္ကြန်အကြတ်နေ့က ဖြစ်ပွားခဲ့သည့် ဗုံးပေါက်ကွဲမှုနှင့် အနီးဆုံးတွင်တည်ရှိသော X2O ရေကစားမဏ္ဍပ်အပါအ၀င် ကန်တော်ကြီးပတ်လမ်း (ကန်ရိပ်သာလမ်း)အတွင်းရှိ ရေကစားမဏ္ဍပ်အချို့ သင်္ကြန်နောက်ဆုံးနေ့တွင် ရေပြန်ကစားနေကြောင်း တွေ့ရှိရသည်။ သို့သော် အဆိုပါ မဏ္ဍပ်များတွင် ဗုံးပေါက်ကွဲမှု မဖြစ်ပွားမီသင်္ကြန်ရက်များကကဲ့သို့ ရေကစားသူများပြားမှုမရှိကြောင်းလည်းတွေ့ရသည်။ ထို့အပြင် အချို့မဏ္ဍပ်များမှာမူ လုံးဝပိတ်သိမ်းထားပြီး ရေကစားခြင်းမပြုတော့ကြောင်း တွေ့ရသည်။
''ကျွန်တော်က X2O မဏ္ဍပ်မှာ ရက်အားလုံးရေကစားဖို့လက်မှတ်ဝယ်ထားတာပါ။ မနေ့က ဖြစ်ရပ်ကြောင့် ဒီနေ့ရေကစားမဏ္ဍပ်ဖွင့်မဖွင့် မသေချာသလို ကျွန်တော်ကိုယ်တိုင်ကလည်း ကစားချင်စိတ်မရှိတော့ဘူး။ ဒါပေမယ့် တစ်နှစ်မှတစ်ခါ ပျော်ရတဲ့ သင်္ကြန်ဆိုတော့လဲ ပျော်ချင်ပါးချင်တဲ့စိတ်က ရှိသေးတာပေါ့။ ဒါပေမယ့် ကိုယ့်အသက်အန္တရာယ်ထက်တော့ အရေးကြီးတာဘာမှမရှိပါဘူးဗျာ။ အခု သူငယ်ချင်းတွေနဲ့ မဏ္ဍပ်မှာ မထိုင်တော့ဘဲ လျောက်လည်ဖို့ထွက်လာရင်းနဲ့ မဏ္ဍပ်ပြန်ဖွင့်နေတယ်ဆိုတာကြားလို့ လာကြည့်တာပါ''ဟု X2O ရေကစားမဏ္ဍပ်တွင် All Days လက်မှတ်ဝယ်ထားသူတစ်ဦးက ပြောကြားသည်။
''ကျွန်တော်တို့ထင်တာက ကန်တော်ကြီးပတ်လမ်းမှာရှိတဲ့ မဏ္ဍပ်အားလုံးနီးပါး ရေကစားမှာမဟုတ်ဘူးလို့ထင်ထားတာ။ ဒီဘက်ရောက်တော့ မဏ္ဍပ်တွေ တချို့ဖွင့်နေတယ်ပြောလို့ ၀င်ကြည့်တာပါ။ မဏ္ဍပ် နှစ်ခု၊ သုံးခုလောက်ကတော့ ရေကစားတာရပ်ပြီး စက်တွေသိမ်းနေတာတွေ့ရတယ်။ ဖွင့်တဲ့ တချို့မဏ္ဍပ်တွေကျတော့လဲ ရေကစားတဲ့သူ မပြောပလောက်တဲ့ အရေအတွက်ပဲရှိတာတွေ့ရတယ်။ ဒီလမ်းထဲရေပက်ခံလာတဲ့ ကားလဲ သိသိသာသာကို မရှိသလောက်နည်းသွားတယ်''ဟု သင်္ကြန်အတက်နေ့(ဧပြီလ ၁၆ ရက်နေ့) ကန်တော်ကြီးပတ်လမ်းအတွင်း ၀င်ရောက်လည်ပတ်သူတစ်ဦးက ရှင်းပြခဲ့သည်။
ယခုနှစ်သင်္ကြန်ကာလတွင် ယခင်နှစ်များကကဲ့သို့ အင်းယားလမ်းအတွင်း မဏ္ဍပ်ဆောက်လုပ်ခြင်းကို ခွင့်မပြုခဲ့ဘဲ ရန်ကုန်တစ်မြို့လုံးတွင် မဏ္ဍပ်အကြီးဆောက်လုပ်ခွင့် ၄၆ ခု ခွင့်ပြုခဲ့ရာတွင် ကန်တော်ကြီးပတ်လမ်းတွင် ရေကစားမဏ္ဍပ် အကြီး ၁၆ ခုဖြင့် အများဆုံးဖြစ်ကြောင်း သိရသည်။ ကန်တော်ကြီးပတ်လမ်းအတွင်းရှိ မဏ္ဍပ်အကြီးများမှာ ပေ ၆၀ နှင့် ပေ ၁၀၀ ကြားရှိသော ရေကစားမဏ္ဍပ်များဖြစ်ကြောင်း သိရသည်။
သင်္ကြန်နောက်ဆုံးနေ့တွင် ရန်ကုန်မြို့ရှိကမ္ဘာအေးစေတီလမ်း၊ ပြည်လမ်းနှင့် မြို့တွင်းဧရိယာများရှိ ရေကစားမဏ္ဍပ်များတွင် ပုံမှန်အတိုင်း ရေကစားနေကြသော်လည်း ရန်ကုန်မြို့ရှိ လမ်းမကြီးများပေါ်တွင်မူ ရေပက်ခံထွက်သည့်ကားများ သိသိသာသာ နည်းပါးသွားကြောင်း တွေ့ရှိရပါသည်။
|
0 comments:
Post a Comment