မိခင်ကြီး ကွယ်လွန်သည်ကို လားရှိုးအကျဉ်းထောင်တွင် နှစ်ရှည် ထောင်ဒဏ် ကျခံနေရသူ ၈၈ မျိုးဆက် ကျောင်းသားခေါင်းဆောင် ကိုမင်းဇေယျကြားသိ ခွင့် မရရှိခဲ့ကြောင်း နှမဖြစ်သူက ပြောသည်။
မိခင်ကွယ်လွန်ကြောင်း ကိုမင်းဇေယျကို အကြောင်းကြားပေးပါရန် မိသားစုဝင်များကထောင်အာဏာပိုင် များထံ မေတ္တာရပ်ခံခဲ့သော်လည်း အကြောင်းကြားမပေးနိုင်ကြောင်း တုံ့ပြန်ခဲ့သည်ဟု အသက် ၅၀ ရှိပြီ ဖြစ်သည့် ကိုမင်းဇေယျ၏ နှမဖြစ်သူ မိနွဲ့နွဲ့ရီက ပြောသည်။
ဓါတ်ပုံ - hittai.net
“အဖေဆုံးတုန်းက အကို မှီလိုက်တယ်၊ အဲဒီတုန်းကဆို ကျမတို့ အုတ်ဂူ မလုပ်လိုက်ဘူး၊ အခု အကိုက အမေဆုံးတာကို မမြင်လိုက်ရဘူး၊ ဂါရဝ ပြုခွင့်လည်း မရလိုက်ဘူး၊ အကို ပြန်လွတ်လာတဲ့ တနေ့မှာ အမေ့ကို ကန်တော့နိုင်ဖို့ ကျမတို့ အုတ်ဂူ လုပ်ထားပါတယ်” ဟု အသက် ၅၀ ရှိ မိနွဲ့နွဲ့ရီက ငိုယိုလျက် ပြောသည်။
ဈာပန အခမ်းအနားသို့ မုဒုံမြို့နယ် ထောက်လှမ်းရေး ၂ ယောက်နှင့် ရန်ကုန်မှ ထောက်လှမ်းရေး ၁ ယောက် လာရောက်လေ့လာပြီး မှတ်တမ်းဓါတ်ပုံများ ရိုက်ယူသွားကြောင်း ကိုမင်းဇေယျ၏ အကိုဖြစ်သူကိုမောင်သိန်း က ပြောသည်။
လားရှိုးအကျဉ်းထောင်တွင် ၆၅ နှစ် ၆ လ ပြစ်ဒဏ် စီရင်ခြင်း ခံထားရသော ၈၈ မျိုးဆက် ကျောင်းသား ခေါင်းဆောင် ကိုမင်းဇေယျာ၏ မိခင်ကြီး မိချစ်ဖွား အသက် ၇၆ နှစ်သည် မေလ ၂၇ ရက်နေ့ ည ၁၁ နာရီ ၂၀ မိနစ်တွင် မွန်ပြည်နယ် မုဒုံမြို့နယ် ကမာဝက်ရွာတွင် ကွယ်လွန်ပြီး မေလ ၂၉ ရက်နေ့ မွန်းလွဲ (၁) နာရီတွင် ကမာဝက်ရွာ နေအိမ်မှ သုဿာန်သို့ ပို့ဆောင်မီးသင်္ဂြိုဟ်ခဲ့သည်။
မိခင်ကြီး၏ ဈာပန အခမ်းအနားသို့ ရန်ကုန်မှ ၈၈ မျိုးဆက် ကျောင်းသားအဖွဲ့နှင့် လုပ်ဖော်ကိုင်ဖက်များက လွမ်းသူ့ပန်းခွေများ ပေးပို့ခဲ့သည်။
ဈာပနသို့ ကိုမင်းဇေယျ၏ ဇနီး ဒေါ်ချိုချိုဝင်း၊ ဒီမိုကရေစီ အင်အားစုများ၊ နိုင်ငံရေးပါတီအချို့မှ ပုဂ္ဂိုလ်များ၊ ဆွေမျိုးသားချင်းနှင့် ရွာသူရွာသား ၃၀၀၀ ကျော် လိုက်ပါပို့ဆောင်ခဲ့ကြသည်။
ကွယ်လွန်သူ မိချစ်ဖွား၏ ခင်ပွန်းမှာ နိုင်ဘရင် ဖြစ်ပြီး သားသမီး (၈) ယောက် ထွန်းကားကာ ကိုမင်းဇေယျမှာ တတိယမြောက်သား ဖြစ်သည်။
ရက်လည်ဆွမ်း အလှူကို ဇွန်လ ၃ ရက်နေ့တွင် ပြုလုပ်မည် ဖြစ်ပြီး ၈၈ မျိုးဆက် ကျောင်းသားများနှင့် လုပ်ဖော်ကိုင်ဖက် ၁၅ ဦး လာရောက်မည် ဖြစ်ကြောင်း သတင်းပို့ထားသည်ဟု မိနွဲ့နွဲ့ရီ က ပြောသည်။
0 comments:
Post a Comment